Von Hansueli Niederhauser
Es isch scho fascht e bitz Tradition
Dass ych my mit Värsli mach zum Clown
Was soll’s – ohni lang z’ studiere
Duen ych’ s nonemool probiere
Maint dr Christian: zieh doch das vom letschte Joor uuse
By dyne Värsli dien doch eh alli pfuuse
Also, es sich e Versuech:
E Hittisauer Wuche Daagebuech (Tagebuch)
Am Mäntig Mittag im Hirsche scho beschti Stimmig
Alli uffgstellt – kaine grimmig
Grossi Begriessig – sali zämme – tönt’s im Chor
Wie hesch es au, was hämmer vor?
Denn dr Blick in d’ Bärge – Schnee isch mager
Hey – simmer do im Summerlager?
Dr Walter maint denn gar nit fuul
Was soll’ s mir bliibe aifach cool
Mir wänn nit über dr fählendi Schnee go flueche
Mir göhn go wandere und go Blüemli sueche
Maint dr Niklaus, lycht gnärvt und quält:
Blüemli sinn ok, aber s’ Everest Feeling fählt
Am erschte Nomi git’s en bloc e Dorfrundgang
Das förderet’ s Kenneleere und dr Zämmehang
Entsprächend kennt me Zoobe alli, by dr Suppe
S’ Gfühl kunnt uff – mir sinn e super Truppe
Die Ainte dien Erinnerige tusche
Waisch no, wo näbe uns 3 Lawine aaberusche?
Und du, wo in dr überhängende Teufelswand
Dy nur no hesch könne heebe mit ainere Hand
Die andere dien sich über die 13. Ränte (AHV) echauffiere
Und in dr Diskussion ganz scharfi Klinge fiehre
Ych frog jetzt lieber nit
Wär bim «jo» und wär bim «nai» macht mit
Sunsch föhn die Diskussione wieder aa
Und mir hänn unsere bunte Oobe kha
Am Zischtig goht’s denn richtig los
D’ Bedingige rächt guet bis famos
Mir Schneeschüeler folge em Bärnhard sym wackere Schritt
ab, richtig Bleichelihorn – das syg nit wyt
Do plötzlig segglet e jungi Frau mit Baby und Ski
Locker lächelnd im Tempo an uns verby
Paar vo uns Männer wäre am Liebschte hindedry
Sälbstverständlig wär’s nur für d’ Unterstützig gsy
Bald druff duet’s ys vor Stuune fascht verbloose
E jungi Frau mit Skischueh und ultrakurze Hoose
Maint ain us de hintere Räng rächt fies
Simmer do im Appezäller Nacktwanderparadies?
Bald druff wird’s Gländ denn schampar steil
Ich weiss, viili vo Euch finde das total g…(toll)
ych lueg uffe – ob mir dien sich 2 Schneeschueh in d’ Yswand kralle
Ych lueg schnäll ewägg – wenn dä wurd aabefalle?
Dr Bärnhard sait: wenn do rutschisch aabe
Muesch Dy mit alle Finger in Schnee iine graabe
Am Beschte duesch au mit de Zähn no schaabe
Dr Vorteil: kasch di grad no an de Schneekristall laabe
Es bliibt denn allerdings by dr Theorie
Für die praktischi Üebig git sich niemer hy
Es isch denn schliesslig ganz guet gange
Kaine isch gschtürzt oder bliibe hange
Bim Aabelaufe mien mir ganz uff dr Siite (Seite) ynefädle
Will d’ Schitüreler locker an uns verby dien wädle
Mir Schneeschüeler – kai bitzli gfruschtet !
Au wenn’s aim scho bitz hätti gluschtet …..
Drfür dien mir bym meditative Aabeschwääbe
D’ Gheimnis vo dr Natur ganz intensiv erlääbe
Dr Mittwuch – e Daag wie uff dr Aasichtskarte
Alli wänn uuse – niemer mag warte
Mir Schneeschüeler uff dr Königstour (Rietberghorn)
Alle folge em Bärnhard in synere Spur
Mir hänn drei Neui, 2 Routinier und ai Beginnere
Die entpuppt sich bald als klari Winnere
S’ erscht mool uff de Schneeschueh gschtande
Und gar nie uff em Hintere glande
D’ Schitüreler yfrig und beseelt vo Füür
Sueche drwile e Schluchte Abentüür (Abenteuer)
Dört wo nämlig sunsch Schnee liegt 2m über em Bach
Findsch das Joor no 2 glaini Fläggli mit Ach und Krach
Drum styyge sie steil ab über Drägg und Gröll
Me maint, s’ syg dr diräggti Wäg in d’Höll
Scho hört me im tiefe Schluchte Dunggle
Diversi bösi Dämone munkle
D’ Tüüreler probiere s’ Glychgwicht nit z’ verliere
Sesch se uff de Felse uff aim Bai balanciere
D’ Ski – kai Chance, wirble hoch duurenand
Dr Walter däne fangt sie mit sicherer Hand
Uff dr andere Siite kraxle sie uffe mit Mieh und Not
D’ Händ uffgrisse – d’ Köpf hochrot
Kuum sinn sie doobe, dr Kampf verby
Finden alli – wow- super dasch wieder mega gsy
Am Donnschtig isch’ s denn ziemlig nass
So macht s’ Skifahre nit wirklig Spass
Es git für uns e breiti Aktivitäte Usswahl:
Schwimme – relaxe – wandere im Sibratstal
Au Viili luege (im Museum) , was es duet nutze
Wenn d’ Fraue für d’ Männer dien putze
Bitz nochdängglig gömmer zrugg ins Hotelzimmer
Jo – epper het putzt – s’ isch suuber wie immer
Zoobe duet dr Ranger Matthias vom Naturpark verzelle
Was sie erreicht hänn und was sie no hänn welle
Do merksch, was’ s bruucht zum e Konsens z’ finde
Viel Toleranz und Ussduur, by so viel stuure Grinde
Hütt am Fryttig wämmer’s nomool wisse
Fertig Rääge, s’ het e glai Loch in Näbel grisse
Es isch ehnder mild und fiecht
Am färne Horizont e Streiffe Sunneliecht
Mir Schneeschüeler göhn, statt dr Gipfel im Nääbel z’ sueche
Diräggt in d’ Burgl (Hütte) zu Kaffi und Kueche
Jetzt am Änd vo dr Wuche simmer alli do
Und au dass’ s guet gange isch hailloos froh
Es isch jetzt Zyt zum dangge saage
Ych find, s’ isch super gsy, s’ git gar nüt z’ klaage
Liebs Leiterteam, Bärnhard – Ida – Tekla – Walter
D’ Uffzellig alphabetisch – nit noch em Alter
Ihr sinn (seid) umsichtig, fründlig und souverän
Mir sinn alli vo Euch voll Fän
Merci für die Wuche – so toll
Do sinn mir des Lobes voll
Au em Hirsche Team gebührt e grosse Dangg
Sie versorge uns nit nur mit Spiis und Drangg
Sie mache’s uff e sympatischi Art und Wiis
Für das griege die dr Hittisauer Verwöhnerpriis
Sunsch möchte y hütt niemer uusestryche
Nit die wo haimlig vo de Schneeschueh uff d’ Ski abschliiche
Nit die wunderbar erfrischende Junge
Au nit die mit de loose Zunge
Nit die charmante total fitte Dame
Oder die, wo falle uss em Rahme
Nur das: d’ Aahnig vom erschte Oobe by dr Suppe
Het sich bestätigt: mir sinn e super Truppe
In däm Sinn – je nochdäm was s’ Schicksal het mit uns vor
Gsehn mir ys wieder – hoffentlich – ime Joor
Das wärs
S’ Änd vom Värs
Hansueli Niederhauser
Februar 2024